UKA 2001 / 26
Inissiani attartortittakkani ineqarnermut tapiissutit pillugit Inatsisartut peqqussutaata allannguuteqarneranik Inatsisartut peqqussutissaattut siunnersuummut nassuiaatit
Nassuiaatit nalinginnaasut
Inatsisartut 2001-imi upernaakkut ataatsimiinnerminni Inissiani attartortittakkani ineqarnermut tapiissutit pillugit Inatsisartut peqqussutaat nr. 3, 31. maj 2001-imeersoq 1. januar 2002-mi atuutilersussanngorlugu akuersissutigaat.
Peqqussummi tassani taaneqarpoq ineqarnermut tapiissutinut aningaasartuutit 40%-ii Nunatta Karsianit aammalu 60%-ii kommunimit aningaasartuutigineqassasut.
Inatsisartut peqqussutaannut qulaani taaneqartumut allannguutissatut siunnersuut saqqummiunneqarpoq Naalakkersuisut aamma KANUKOKA-p akornanni 2002-mut ukiunilu kinguliini kommuninut ataatsimoortumik tapiissutissat pillugit isumaqatigiissutaata kingunerisaanik.
Boligstøttimit illuutini ineqarnermut tapiissutit peqqussutissami nutaami ikaarsaariarnermi aalajangersakkat naapertorlugit 2002-mi aprilip naanera tikillugu tunniunneqassapput. Taakkununnga ineqarnermut tapiissutinut aningaasartuutit piffissami 1. januar 2002-mit 30. april 2002-mut inissiani attartortittakkani ineqarnermut tapiissutit assigalugit 60%-ii Namminersornerullutik Oqartussanit 40%-iilu kommuninit aningaasartuutigineqassapput.
Ineqarnermut tapiissutit pillugit peqqussummi atuuttumi aningaasartuutit aningaasaliiviginissaanni taaneqarpoq Nunatta Karsia tapiissuteqartassasoq. Nunatta Karsiata tapiissutissai Aningaasanut Inatsisip akuersissutigineqarneranut atatillugu aalajangersarneqarput boligstøttimilu illuutinut ineqarnermut tapiissutit piffissami 1. januarimiit 30. april 2002-mut aningaasaliivigineqarnissaanni allannguutini taamaattumik Aningaasanut Inatsit malinneqassalluni.
Siunnersuut Aningaasaqarnermut Pisortaqarfimmut tusarniaassutigineqarpoq, tamatumanilu oqaaseqaateqartoqarani. Siunnersuutip teknikkimut aningaasaqarnermullu tunngalluinnarnera pissutigalugu oqartussaasoqarfinnut allanut siunnersuut tusarniaassutigineqanngilaq.
Siunnersuutip allaffissornikkut aningaasaqarnikkullu kingunerisassai
Siunnersuut allaffissornikkut kinguneqassanngilaq.
Inissiani attartortittakkani ineqarnermut tapiissutit 1. januar 2002-miit allannguuteqarnissaat ataatsimut isigalugu allaffissornikkut aqutsinermi kinguneqassagatinneqarpoq, pissutigalugu inuit amerlanerusut ineqarnermut tapiissutinik pisinnaatitaalissammata. Tassunga suliaqarnerulernissamut kommuninut 2002-mut ataatsimoortumik tapiissutitigut kommunit taarsiivigineqarput.
Siunnersuut kommuninut ukiumut 5 mio. koruuninik ileqqaarutaassaaq. Taamatut ileqqaaruteqarnissaq kommuninut ataatsimoortumik tapiissutissani ilanngullugu naatsorsorneqarpoq.
Aalajangersakkanut ataasiakkaanut nassuiaatit
§ 1-imut
Aalajangersakkami aalajangersarneqarpoq inissiani attartortittakkani ineqarnermut tapiissutinut aningaasartuutit Nunatta Karsianit 60%-imik kommunimillu 40%-imik agguataarneqassasut.
Imm. 2 nutaatut siunnersuutigineqarpoq, tassani Naalakkersuisut naatsorsuutinik saqqummiussineq kukkunersiuinerlu pillugit malittarisassanik aalajangersaanissaannik periarfissinneqarlutik. Aalajangersagaq taanna ilanngunneqarpoq, siunissami ineqarnermut tapiissutinut aningaasartuutit annertunersaat Nunatta Karsianit aningaasartuutigineqartussaanerat pissutigalugu.
§ 2-mut
Allannguut inissiani attartortittakkani ineqarnermut tapiissutit pillugit Inatsisartut peqqussutaata nr. 3, 31. maj 2001-imeersup atortuulernera peqatigalugu atuutilissaaq.